Seis anos de diversidade
Hai xa seis anos que Sons da Diversidade naceu coma un ciclo de difusión das chamadas músicas de raíz. A Concellaría de Cultura de Santiago de Compostela puxo en marcha o proxecto no ano 2004, e o ciclo resultou ser a mellor proposta para a dinamización dun espazo como é o Auditorio de Galicia, hoxe emblemático.Nestes anos, Sons da Diversidade achegou ás primaveras e outonos composteláns a música de case 40 artistas de todo o mundo. Michael Nyman, Lila Downs, Lhasa, Habana Blues Band, Kroke, Adriana Calcanhoto, Goran Bregovic, Jane Birkin, Laurie Anderson ou Manu Dibango foron só algúns deles. Especialmente destacable foi, na pasada edición, a volta aos escenarios de Fuxan os ventos.
Na tempada 2009 - 2010 que agora comeza poderemos gozar do talento xaponés de Ryuichi Sakamoto para inaugurar a programación. Logo virán as propostas mestizas da Orquestra Árabe de Barcelona e Sumrrá, xa en 2010. As voces masculinas de Rodrigo Leao, Roi Casal, Femi Kuti e Benjamin Biolay maracarán a transición cara a primavera, con estilos tan diversos como o folk fusion ou o afrobeat. Por último, a expresiva proposta de Meredith Monk será a encargada de fechar en xuño os concertos desta nova tempada.
